Investigashon di ‘Blackout’ di RAC ta mustra mehorashonnan den suministro di koriente

WILLEMSTAD – Stabilidat i konfiansa di e suministro di koriente ta di gran importansia pa komunidat i ekonomia di Kòrsou. E diferente interupshonnan di koriente den añanan anterior, bou di kua e ‘blackouts’ di nos isla kompletu, a eksponé esaki klaramente. Kompania di utilidat Aqualectra a hasi investigashon di esaki e tempu ei. E resultadonan di e investigashonnan ei i e puntonan di mehorashon ku a keda identifiká, a keda evaluá seguidamente di forma independiente na 2023/2024 dor di Regulatory Authority of Curaçao (RAC). A hasi esaki ku sosten di e büro di konseheria ENGIE/Laborelec ku ta internashonalmente renombrá.

Apesar di esaki, tabatin un ‘blackout’ atrobe riba 27 di ougùstùs 2025. Pa e motibu aki RAC a anunsiá djis despues ku lo kuminsá ku un investigashon adishonal. E enfoke di e investigashon aki tabata riba progreso di implementashon di e puntonan ku a keda identifiká anteriormente. Hustamente pasó e puntonan ei tabata dirigí riba mehorashon di e stabilidat i konfiansa den suministro di koriente. Tambe a wak e situashon spesífiko ku a tuma lugá riba 27 di ougùstùs 2025 i e proseso di restourashon ku Aqualectra a implementá.

Huntu ku ENGIE/Laborelec, eksperto riba tereno di sistemanan di elektrisidat, RAC a bishitá Aqualectra na fin di novèmber 2025. A hiba kòmbersashonnan diverso tokante di progreso den implementashon di e puntonan di mehorashon, i a opservá esakinan den e diferente partinan físiko di e sistema di elektrisidat.

E investigashon a mustra ku generalmente por nota progreso den e sistema di elektrisidat riba tres área di atenshon fundamental, esta: seguridat di sistema, produkshon di elektrisidat i stabilidat di ret, pero tambe organisashon i proseduranan. Asina a desaroyá i implementá un gran parti di filosofia di seguridat kompletamente revisá. Tambe a instalá un sistema di almasenahe di elektrisidat den bateria pa mehorá e maneho di e ret eléktriko, i a adaptá e organisashon tékniko konforme e nesesidatnan di e operashon. Ya a i lo sigui atendé debidamente ku e puntonan fundamental di mehorashon ku a bin dilanti den pasado riba e áreanan aki. Awe nan ta kontribuí na un suministro di elektrisidat mas stabil i konfiabel.

Ku referensia na e ‘blackout’ ku a tuma lugá dia 27 di ougùstùs 2025, por indiká ku esaki tabata resultado di un kombinashon kompleho i desafortuná di sirkunstansianan tékniko. Pa prevení ku un situashon asina ta ripití, a implementá medidanan konkreto. E kousa di e ‘blackout’ aki no tabatin relashon ku e defisiensianan tékniko ku a identifiká anteriormente, ku entretantu ya a atendé i koregí pa gran parti.

Apesar ku nunka no por ekskluí interupshonnan di koriente kompletamente, e mehorashonnan implementá ta redusí e riesgo i ta yuda limitá e konsekuensianan den kaso ku tòg nan tuma lugá. E oumento den kompleksidat di suministro di koriente, entre otro pa motibu di transishon energétiko sostenibel, ta rekerí atenshon kontinuo pa garantisá stabilidat i konfiansa. RAC lo sigui kontribuí ku esaki pa medio di supervishon transparente den e sektor.

Lesa e rapòrt kompletu di e investigashon, inkluso e resultadonan i e puntonan di mehorashon.

[FINAL DI KOMUNIKADO DI PRENSA]

Nota pa redakshon: Pa mas informashon tokante e komunikado aki bo por tuma kontakto ku Regulatory Authority of Curaçao via +(599-9) 463-1700.

Download e pdf di e komunikado aki: PAP.
Download e komunikado di prensa na Hulandes: NL.
Download e komunikado di prensa na Ingles: ENG.

(Fuente: RAC. Periodo di publikashon: 2026)