Benta i uso di aparatonan di Starlink no ta pèrmití miéntras no a otorgá un konseshon

Willemstad – RAC a risibí indikashon ku tin bendementu i uso di aparatonan di Starlink na Kòrsou. Sin embargo, na e momentu aki Starlink no ta disponé di un konseshon pa ofresé servisionan di telekomunikashon na Kòrsou. Miéntrastantu no otorgá un konseshon, no ta pèrmití pa ni kompanianan ni personanan bende òf usa e aparatonan i servisionan aki.

Ta di sumo importansia pa un i tur por hasi uso di e spectrum di frekuensia na Kòrsou liber di interferensia. Pa e motibu ei, tin reglanan mará na uso di esaki, ku entre otro ta stipulá den un konseshon. Konsekuentemente, RAC lo aktua kontra proveedónan i rebendedónan di aparatonan di Starlink, te na momentu ku otorgá un konseshon na Starlink.

Asina ku tin mas desaroyo ofisial relashoná ku e desishon definitivo tokante e petishon di Starlink pa un konseshon, e instansianan outorisá lo komuniká tokante esaki.

[FINAL DI KOMUNIKADO DI PRENSA]

Nota pa Redakshon: Pa mas informashon tokante e komunikado aki bo por tuma kontakto ku Regulatory Authority of Curaçao via +(599-9) 463-1700.

Pa e vershon digital di e komunikado di prensa aki: PAP.
Pa e komunikado di prensa aki na Hulandes klek aki.

(Source: RAC. RAC publication period: 2026)