Aklarashon tokante petishon di konseshon di Starlink

Willemstad, 28 mei 2026 – Regulatory Authority of Curaçao (RAC) a tuma nota di diferente publikashon i spekulashon públiko tokante petishon di konseshon di Starlink. Den e kuadro aki, RAC ta konsider’é importante pa enfatisá ku e proseso formal di tomo di desishon ainda ta  den desaroyo i ku te na momentu aki ainda no tin un desishon final tokante otorgamentu di konseshon na e kompania.

En prinsipio, RAC no ta komuniká tokante petishonnan durante di un proseso  di petishon ni tokante empresanan ku a entregá petishon. Sinembargo, mirando e interes den komunidat i den kuadro di transparensia, RAC ta konsiderá deseabel pa, den e kaso spesífiko aki pa duna un splikashon general tokante e estado aktual di e proseso.

RAC tin komprenshon pa e interes den komunidat pa formanan nobo di konektividat i servisio di internèt inovadó. RAC ta habrí eksplísitamente pa desaroyonan teknológiko i solushonnan inovadó ku por kontribuí na desaroyo digital, konektividat, resiliensha i kresementu ekonómiko di Kòrsou. Asumiendo e responsabilidat ei, RAC ta stimulá i fomentá inovashon aktivamente den e sektor.

Na mes momentu, kada petishon di konseshon mester keda evaluá ku hopi koutela, di forma independiente i den e kuadro legal i di regulashon vigente. Komo parti di  e evaluashon ei ta wak, entre otro, aspektonan tékniko, hurídiko, operashonal i interes nashonal.

E petishon en kuestion ta relashoná ku ofresementu di servisio di telekomunikashon na Kòrsou i e ta aktualmente  den un fase avansá di evaluashon serka RAC.

Loke a keda menshoná anteriormente no ta nifiká outomátikamente ku ya na yüni 2026 lo tin un desishon final tokante konseshon ni ku por kuminsá ku benta i servisio komersial. Un eventual konseho na minister ta forma solamente un paso den e proseso mas amplio di tuma desishon.

Miéntras ku e proseso di tuma desishon no a ser finalisá, no tin asuntu ainda di un konseshon otorgá pa servisio komersial na Kòrsou. E konsumidó i empresanan mester ta konsiente ku eventual kompra di ekipo òf uso di servisio promé ku e proseso finalisá no ta nifiká ku e servisio ya ta ofisialmente permití na Kòrsou. Ku otro palabra: miéntras ku no a otorgá konseshon, no por tin servisio komersial.

RAC lo kontinuá ku e proseso di tuma desishon ku debido koutela, transparensia i ku e interes general di Kòrsou na promé lugá. RAC lo kompartí mas informashon asina ku e proseso ta permití.

[FIN KOMUNIKADO DI PRENSA]

Nota pa redakshon: Pa mas informashon tokante di e komunikado di prensa akí, por tuma kontakto ku Regulatory Authority of Curaçao na +(599-9) 463-1700.

Download e komunikado di prensa akinan PAP.
Version digital di komunikado na Hulandes: NL.

(Fuente: RAC. Periodo di publikashon: 2026)