RAC ta subrayá su impakto kresiente riba Kòrsou den su informe anual Impakto 2025

WILLEMSTAD – Regulatory Authority of Curaçao (RAC) a presentá ofisialmente su kuenta anual 2025, ku título IMPAKTO, na Minister di Tráfiko, Transporte i Planifikashon Urbano (VVRP), Sr. Charles Cooper. Ku e informe aki, RAC ta pone énfasis riba su ròl ku ta sigui krese den komunidat di Kòrsou: for di supervisá servisio esensial di utilidat i internèt, te kontribuí na resilensia digital, inteligensia artifisial, komunikashon durante situashonnan di krísis i ordená merkado di salubridat. Curt Belfor, direktor di RAC, a hasi entrega ofisial di e informe anual na minister Sr. Charles Cooper i na presidente di e Hunta di Supervishon, Sra. Sueena Francisco.

Durante e presentashon, Sr. Belfor, a duna un splikashon tokante e nifikashon tras di e título IMPAKTO. Segun Belfor, e título no solamente ta reflehá e influensia sosial i ekonómiko di RAC, sino tambe e responsabilidat ku e organisashon ta karga den desaroyo digital di Kòrsou.  “Real impact begins when leadership moves beyond managing the present and starts shaping the future with purpose,” asina Belfor a deklará.

Segun RAC, e vishon aki tabata visibel den diferente área durante 2025. Asina, supervishon riba servisio di internèt a sigui ampliá i RAC a kontinuá ta responsabel pa e kalkulashon mensual di tarifa di utilidat i kombustibel. Ademas, investigashonnan ta mustra ku e sektornan ku RAC ta supervisá huntu ta representá kasi 25 porshento di e Produkto Interno Bruto (GDP) di Kòrsou.

RAC a fortifiká su posishon tambe den e área digital. Aworakí e organisashon ta asigná komo koordinadó di e strategia nashonal di AI i, komo ESF2, ta hasi un kontribushon aktivo durante kalamidatnan i situashonnan di desaster. A resaltá tambe e kontribushon di RAC na e sistema di cell broadcasting ALERTA, destiná pa atvertí e poblashon rápidamente i efikasmente durante situashonnan di emergensia.

Segun RAC, IMPAKTO no ta un tema di solamente un aña, sino un rumbo struktural ku lo sigui guiando e organisashon den e añanan benidero, den línea ku su mishon: “to guarantee fair and transparent regulation for a thriving Curaçao.”

RAC, durante di e presentashon na Minister i presidente di Hunta di Komisario, a informá tambe ku su ouditor eksterno EY a entregá un deklarashon di aprobashon di su kuenta riba 16 di aprel último. E informe anual a keda finalisá formalmente e mesun dia. Despues di e presentashon, EY a duna un splikashon di e konklushonnan prinsipal di e auditoria. RAC a sera e aña 2025 ku un resultado positivo.

[FIN KOMUNIKADO DI PRENSA]

Nota pa redakshon: Pa mas informashon tokante di e komunikado di prensa akí, por tuma kontakto ku Regulatory Authority of Curaçao na +(599-9) 463-1700.

Download e komunikado di presenta akinan PAP.
Version digital di komunikado na Hulandes: NL.
Download e kuenta anual Impakto 2025

Fuente: RAC. Periodo di Publikashon: 2026)